Në prag të Kongresit të dytë, që pritet të mbahet më 20 dhe 21 dhjetor, në Bashkimin Demokratik për Integrim (BDI) kanë filluar edhe kalkulimet për reforma kadrovike si brenda kësaj partie ashtu edhe për postet e reja në ekzekutiv. Siç merr vesh “Lajm”, nga burime të besueshme brenda partisë së Ali Ahmetit, dy nënkryetarët, Tetuta Arifi dhe Rafiz Haliti dhe sekretari gjeneral Gëzim Ostreni do të shkarkohen, ndërsa në vend të tyre do të emërohen kuadro që deri më tani nuk kanë pasur poste të larta në këtë parti. Sipas këtyre burimeve, Kryetari aktual i Komunës së Sarajit, Blerim Bexheti dhe zëvendëskryeministri për implementimin e Marrëveshjes së Ohrit, Abdylaqim Ademi do të emërohen si nënkryetarë të BDI-së, ndërsa Xhevat Ademi do të zëvendësojë Ostrenin në pozicionin, sekretar gjeneral i partisë. Sipas të njëjtit burim Gëzim Ostreni do të emërohet përfaqësues i qeverisë në bordin e T-Mobile, ndërsa dy nënkryetarët aktual, Arifi dhe Haliti nuk do të zënë asnjë vend as brenda partisë së tyre e as në ekzekutiv. Sipas këtyre burimeve, tanimë është i sigurt largimi i Nexhati Jakupit nga Ministria e Ekologjisë dhe në vend të tij do të vijë drejtori aktual i aeroportit, Orhan Ademi, ndërsa në vend të tij, me aeroportin e Shkupit do të udhëheq ish ministri i transportit dhe lidhjeve Xhemali Mehazi. Zëvendës ministri i Punëve të Brendshme, Xhevat Buçi do të kalojë zëvendës sekretar i qeverisë, duke zënë kështu vendin e Abdulla Azirit i cili bashkë me Jakupin rrezikojnë të mbeten pa ndonjë post të ri. Edhe ministri për Punë Sociale, Xhelal Bajrami, pritet të shkarkohen nga ky post, ndërsa Lindita Qazimi do të mbetet edhe më tej në Ministrinë e Arsimit, meqë kjo e fundit tanimë ka dorëzuar postin e deputetit, për ti lëshuar vendin Vullnet Ahmetit i cili nuk u pranua nga Gruevski si zëvendësministër i Arsimit.
Lika i padëshirueshëm për Gruevskin
Pas largimit të Xhevat Buçit nga MPB, postin e njeriut të dytë në këtë ministri pritet ta zë Muhamed Ismaili i cili për momentin është zëvendës drejtor i agjencisë për kundër zbulim, ndërsa në vend të Muhamed Ismailit është propozuar ish kryetari i Komunës së Tetovës, Hazbi Lika. Por, sipas burimeve brenda BDI-së, partneri qeveritar dhe kryeministri Nikolla Gruevski ka kundërshtuar emërimin e Likës në këtë post, për arsye që për momentin është i njoftuar vetëm kryetari Ahmeti. Andaj, brenda partisë shqiptare në Qeveri ka hapësirë për një rokadë mes Ismailit dhe Likës në MPB dhe drejtorinë për kundërzbulim.
/Arben Zeqiri/
